بندم يا أمي اتفضلو

السلام عليكم ورحمة الله وبركاته
إخواني وأخواتي يمكن من أهم أهداف القسم ده إننا نبقى في خدمة
آبائنا وأمهاتنا المتواجدين في دور المسنين ونخصص ليهم ولو جزء بسيط
من وقتنا بس الأهم من ده في نظري وده الهدف لي مابين السطور هو
إننا نكون سبب في إنه مايبقاش فيه ناس ربو وكبرو وتعبو وشقيو عشان
آخر المطاف ولادهم يرموهم وآسفة للكلمة في دور المسنين لأنه ده اكبر
نكران للجميل وما يرضيش لا ربنا ولا اي حد
عشان كده حبيت أفتتح مواضيعي في القسم ده بقصيدة حبيتها جدااااااااااا
أتمنى نقراها كلنا ونركز شوية فيها ونحاول نعيش معاها

كل لحظة ف عمرى عدت
كنت أقدر يا أمه أجيكي
وف إدية حاجه ليكي
واحضنك
وأبوس إيديكي
بس عدت مني من غير كل ده
باندم عليها





كل كلمة حب يا أمه
كنت ممكن يوم أقولها
تسعدك
بس ملحقتش اقولها بانقهر
واندم عليها

كل لقمة طعمها
كان حلو يا امه أكلتها
من غير ماجيب لك زيها
وانا كنت أقدر أسعدك لو جبتها
بس هنتى عليه يامه بافتكر
واندم عليها

كل لحظة يامه سبتك
تزعلى مني وفتك
واتنست من كتر طيبتك
بس ما ندمتش عليها
أو رجعت أوام يا أمي
أطلب الغفران عليها
كل دمعة يا أمي فرت من عنيكي
وانت بتبصي لقساوتي وعندي ليكي
واتنست من كتر طيبتك
والضنا ما يهون عليكي
بس ما ندمتش عليها باعتذر
والله آسف جاي باتندم عليها

كل يا امه ما افتكر ..
ان قلبك كان طريق للجنة باب للمرحمة
باب رضاكي يامه مفتوح من إديكي للسما
كنت عارف أيوه عارف إنما
من غفلتي
اتقفل من يوم ما غبتي عن حياتي ودنيتي
والنهاردة جاي اوصي كل واحد لسه عنده الباب موارب للنعيم
روح وبوس إيد الحبيبة
روحلها وكفاية غيبة
وابكي بالدمعة القريبة

روح يا صاحبي اتوضا من بسمة حنانها
واروى قلبك من أمانها
قلها آسف يا أمي
قلها سامحي يا امي
قلها فضفض وحكي
وارتمي في الحضن واشكي
وابتسم واضحك أو ابكي
بس روح والحق وخللى القلب
بالخير يغتسل
قبل ما الباب يتقفل
قبل ما تعدي الليالي وتنقهر
زيي عليها
روح وبوس يللا اديها
روح وبوس يللا اديها

شعر / صلاح جلال